Մեր մասին

«Խնամի» պալիատիվ կենտրոնը մասնագիտացված բժշկական կենտրոն է, որը պալիատիվ բժշկական օգնություն և խնամք է տրամադրում  ծանր և քրոնիկ հիվանդություններով տառապող բուժառուներին։

Կենտրոնը հիմնադրվել է 2019 թվականին՝ Երևանում ի պատասխան պալիատիվ օգնության բժշկական ծառայությունների տարեց տարի աճող անհրաժեշտությանը։ 2020 թվականից «Խնամին» սկսել է ընդունել բուժառուների և իրականացնել պալիատիվ բժշկական օգնություն՝ ստացիոնարում և բուժառուի տանը։

Իր գործունեության վեց տարիների ընթացքում «Խնամի» պալիատիվ կենտրոնը բժշկական օգնություն և խնամք է տրամադրել հարյուրավոր տարբեր ծանր հիվանդություններով   և կլինիկական վիճակներով բուժառուներին։ Մեր բուժառուների թվում են ուռուցքաբանական հիվանդություններ ունեցող, նեյրոդեգեներատիվ հիվանդություններով տառապող, ինսուլտից և կոտրվածքից հետո ծանր ֆունկցիոնալ խանգարումներով անձինք, դեմենցիա ունեցող բուժառուներ, ինչպես նաև այլ ծանր և քրոնիկ հիվանդություններից տառապող մարդիկ։

Պալիատիվ բժշկական օգնության հիմնական նպատակն է բարելավել բուժառուի կյանքի որակը, թեթևացնել ցավը և հիվանդության հետ կապված այլ ախտանշանները, ինչպես նաև աջակցել բուժառուին և նրա ընտանիքին հիվանդության տարբեր փուլերում։

Տարիների ընթացքում «Խնամին» ձևավորել է վստահելի համագործակցություն բուժառուների և նրանց ընտանիքների, ինչպես նաև բժիշկների և այլ բուժաշխատողների հետ։ Մեզ համար այս վստահությունը մեր աշխատանքի կարևորագույն գնահատականներից է և միևնույն ժամանակ՝ մեծ պատասխանատվություն։

«Խնամի» կենտրոնի կարևորագույն առավելություններից մեկը մեր մասնագիտական թիմն է։ Բժիշկները, բուժքույրերը և խնամքի մասնագետները աշխատում են որպես միասնական թիմ՝ առաջնորդվելով պալիատիվ բժշկության հիմնարար սկզբունքներով և յուրաքանչյուր բուժառուի անհատական կարիքների գնահատմամբ։

Մենք հավատում ենք, որ ծանր քրոնիկ հիվանդության դեպքում բժշկական օգնությունը չպետք է սահմանափակվի միայն հիվանդության բուժմամբ։ Երբ հիվանդության բուժումը այլևս հնարավոր չէ կամ բուժման հիմնական նպատակը հիվանդության վերացումը չէ, պալիատիվ օգնությունը կենտրոնանում է ախտանշանների վերահսկման, կյանքի որակի պահպանման և բարելավման, ինչպես նաև բուժառուի արժանապատվության ապահովման վրա։

Մեր առաքելությունն է տրամադրել պալիատիվ բժշկական օգնություն՝ արժանապատվությամբ, մասնագիտական բարձր պատասխանատվությամբ և բարությամբ։

«Խնամի» կենտրոնում յուրաքանչյուր բուժառու առաջին հերթին մարդ է՝ իր բժշկական, հոգեբանական, սոցիալական և ընտանեկան կարիքներով։ Այդ պատճառով մեր աշխատանքում կարևոր է ոչ միայն հիվանդության  ախտանշանների կառավարումը, այլև բուժառուի և նրա ընտանիքի ամբողջական աջակցությունը։